Gen 25 | WSK | STEP | Abraham ko nuwus laun Sarah kueram, se nu aking imet bo tam, ko nup Keturah.

Genesis 25

Abraham ko numasari saki

1 Abraham ko nuwus laun Sarah kueram, se nu aking imet bo tam, ko nup Keturah. 2 Se imet Keturah kuriang iluwam mu Zimran, Jokshan, Medan, Midian, Ishbak, se Shuah. 3 Se Jokshan ko kuriang mu Sheba se Dedan. Se Dedan ko kuriang numasari mu Asshur, Letush, se Leum kariimet. 4 Se Midian ko kuriang kari mu Ephah, Epher, Hanoch, Abida, se Eldaah. Se kari ari mu Keturah ko numasari, ko taleng girigir alo.

5 Abraham noko mel suen biya mu Isaac tuam. 6 Bare tom nu marak baga se, ko imet saki nunga kuriang alo mu mel saki am munan iwita nungaram, ale nunga awuram se koma worem bausa mu te nama gilingiman, noko kuriang Isaac kumik duap te mena.

Abraham kueram se mutim tuguman

7 Abraham 175 yar baga garukaram nunguningkiri, ale kueram, se ko marak nama ko nongotak ari arungu biguwuram. 9 Se ko kuriang ilagala, Isaac Ishmael ilak, manga gogong Machpelah, Mamre koma worem bausa te namara mu te mutim tuguman. Ali mu ulengkala Zohar, Heth kari, ko namar Ephron ko ali, bare Abraham dia tam, 10 Heth kariimet nongote dia tam. Se ali umutang te Abraham ko nuwus Sarah ilak nunga mutim tuguman.

11 Abraham kueram se Kaem Isaac marak tuam. Tom mu te Isaac Beer-Lahai-Roi te bagakaso.

Ishmael ko kuriang imas se ko taleng girigir

12 Imi Abraham ko namar Ishmael ko dugu duap. Ishmael mu Abraham ko kuriang Egypt imet Hagar iluwam. Hagar mu Sarah ko ura saonga imet.

13 Se Ishmael ko kuriang kari arataman mu iwita: Nebaioth mu laun, se udagi mu Kedar, Adbeel, Mibsam, 14 Mishma, Dumah, Massa, 15 Hadad, Tema, Jetur, Naphish, se Kedemah. 16 Kari 12 umutang mu kariimet motam 12 nunga girigir, se nunga nunup nunga sor sor te dagiman mu te awuman. 17 Ishmael 137 yar baga kueram, se ko marak nama ko nongotak ari arungu biguwuram. 18 Se Ishmael ko taleng girigir alo mu wonong ilagala Havilah Shur nunga kusumuri bagakasan, mu Egypt koma worem bausa mu te lage Asshur namara mu te bagakasan. Bare nuna nononga gue suwan saki arungu nongomang suwanta me bagakasan. ^{▼▼Gen 25:18 Verse imitang mu Hebrew den te wetang te mena. Bala bo mu iwita: Bare nononga gue suwan arungu me bagakasan.}

Esau Jacob ilak bilangaman

19 Imi Abraham ko namar Isaac ko dugu duap.

20 Isaac ko yar 40 nu Bethuel ko nanawus Rebecca tam. Bethuel mu Mesopotamia sor te wonong Aram ko kari. Se Rebecca ko koras mu Laban.

21 Bare Rebecca kuriang mena. Se Isaac Kari Biya Rebecca sangukko ko aru maonam. Se Kari Biya Isaac ko kuring iluwam se Rebecca tuagu aratam. 22 Ale kuriang ilagala noko tuagu ningi, se nunumi moakasan. Se Rebecca balam, “Awuk se kilek ewere ani angimik te aratoso ya?” Ale nu kilek owore ko duap ko Kari Biya isuokko namaram.

23 Se Kari Biya iwita Rebecca maonam,

“Kari ilagala ni tagu ningi mu maingte kariimet motam ilagala aratomon ale nunumi kiamonko karogo kaemon.
Se bo barasuk bo kiarukko.
Kari laun mu kari uria mu ko dungan bagurukko.”
24 Se Rebecca kuriang iluwokko tom pingi aram se diram nu kuriang kari ilagala nunga iluwam. 25 Se kuriang giram bilangaram mu kumik diriyam se kumik mone gurum. Butata se nup beteman “Esau” maman. ^{▼▼Gen 25:25-26 Nup Esau mu ko nunguning mu “kumik mone gurum”. Se nup Jacob mu ko nunguning mu kari mel ilukuawuso ale ko sail te tagi bataguru taso umutang Jacob.} 26 Se bo udagi bilangaram mu kuting laun Esau ko suwik durum ilukuawura la ago aratam, se ko nup beteman Jacob maman. Isaac yar 60 bagaram se Rebecca kuriang ilagala umutang nunga iluwam.

Esau ko marak ningo saparam

27 Se kuriang mu lagaman. Esau bulamara kari ningo ko aratam. Nu wonong te bagurukko me kuakaso, am giarum ningi bulamurokko geraga lagakaso. Jacob mu kari lila se nu uningi bagakaso. 28 Isaac Esau bulamukaso ago taikaso se Rebecca kamikaso se nokaso, ale nu Esau ko ninguru kuakaso. Bare Rebecca mu Jacob ko kuakaso.

29 Bare tom bo Jacob bin kumin bitawaram se Esau bulamurokko geraga laga na ko nunguningkiri kueram, ale tairam, 30 ale Jacob maonam, “Ani na ko ninguru kuerem,” mam. “Kumin diriyam beterem sowore sang ais se naikko,” mam. Umutang ko nuna Esau arukasan Edom masan. ^{▼▼Genesis 25:30 Nup Edom mu ko nunguning mu “diriyam”.}

31 Bare Jacob balam, “Ani kisekko pa! Bare ni kari laun kete marak ningo sumu ani aisu asele ani kisekko.”

32 Se Esau balam, “Mu terong! Ani kuerikko pingita, se aninga marak ningo imi anape yawara ani aisukko?”

33 Bare Jacob balam, “Ni Kari Biya koma te nunguningta balu nika marak ningo ani aisuko balu asele.”

Se Esau Kari Biya koma te nunguningta nunguning mam ale ko marak ningo ko uria Jacob tuam. Se Jacob bread se kumin sang Esau tuam. Se nu na yu nam mu barasam eng namaram. Nu kari laun ma balam ale ko marak ningo mu ko ikia me tam.

34